«Кыргызстан улуттук электр тармагы» ААКнын филиалы Чүй электр тармактар ишканасында ишкананын ишмердүүлүгүнүн өзгөчөлүктөрүн эске алуу менен иштелип чыккан ERP системасынын презентациясы жана демонстрациясы болуп өттү.
Долбоор Азия өнүктүрүү банкынын каржылык колдоосу менен ишке ашырылууда. Системанын үстүндө иштөө процессинде Чүй электр тармактар ишканасынын практикалык муктаждыктарын эске алуу менен бир катар кошумча иштеп чыгуулар киргизилди. Атап айтканда, ERP системасына бухгалтердик эсеп блогу кошумча киргизилди.
ERP системасы ишкананын ишмердүүлүгүнүн негизги багыттары боюнча маалыматтарды бириктирип, тиешелүү кызматтарга актуалдуу маалыматтарга жеткиликтүүлүктү камсыздайт. Бул бөлүмдөр ортосунда маалымат алмашуунун ыкчамдуулугун жогорулатууга, иш процесстерин оптималдаштырууга жана башкаруунун натыйжалуулугун арттырууга мүмкүндүк берет.
Системаны иштеп чыгууда жана маалыматтар менен толтурууда, Чүй электр тармактар ишканасынын кызматкерлери маанилүү роль ойношот. Алар ERP системасы менен түздөн-түз иштеп, аны маалыматтар менен толтурууга катышып, ишкананын ишмердүүлүгүнүн өзгөчөлүктөрүн эске алуу менен зарыл болгон маалыматтарды беришет.
Демонстрацияга Teralink жана Н-Системс компанияларынын консультанттары, ошондой эле Чүй электр тармактар ишканасынын жетекчилиги жана кызматкерлери катышты.
Иш-чарага төмөнкүлөр катышты:
Кыргыз Республикасынын энергетика министринин орун басары Бекнур Маратбеков;
Кыргыз Республикасынын Энергетика министрлигинин долбоорлор бөлүмүнүн башчысы Кубаныч Беков;
«КУЭТ» ААКнын башкы директорунун капиталдык курулуш жана инвестициялар боюнча орун басары Искандер Адиев;
«КУЭТ» ААКнын тышкы байланыштар бөлүмүнүн башчысы Эмиль Артыкбаев;
Чүй электр тармактар ишканасынын директору Доктурбай уулу Жолдошбек.
Демонстрациянын жүрүшүндө катышуучулар ERP системасынын учурдагы мүмкүнчүлүктөрү, киргизилген кошумча иштеп чыгуулар, айрым кызматтардын функционалдык мүмкүнчүлүктөрү жана актуалдуу маалыматтарга жетүү жолдору менен таанышты.
Иш-чаранын негизги максаттарынын бири — Чүй электр тармактар ишканасында иштелип чыгып, сыноодон өткөн чечимдерди «КУЭТ» ААКнын башка филиалдарына жайылтуу.
Чүй электр тармактар ишканасынын кызматкерлеринин практикалык тажрыйбасы жана системага киргизилген кошумча иштеп чыгуулар башка филиалдарда ERP системасын мындан ары киргизүүдө алардын ишмердүүлүгүнүн өзгөчөлүктөрүн эске алуу менен колдонулушу мүмкүн.
ERP системасын өркүндөтүү боюнча иштер улантылууда. Бул иштер процесстерди мындан ары санариптештирүүгө, кызматтар ортосундагы өз ара байланышты натыйжалуу уюштурууга жана актуалдуу маалыматтарга ыкчам жеткиликтүүлүктү камсыз кылууга багытталган.
